မြန်မာစကားပုံများထဲက ဆင်နှင့်ပတ်သတ်သော စကားပုံများ

 

မြန်မာစကားပုံများထဲမှ ဆင်နှင့်ပက်သက်သော စကားပုံသုံးခုကို အနက်အဓိပ္ပါယ် သာဓကများနှင့်တကွ ဖော်ပြပါရစေခင်ဗျာ။

ဆင်သေကို ဆိတ်ရေနှင့်ဖုံး

အလွန်ကြီးမားသော ဆင်သေကြီးကို သေးငယ်လှသော ဆိတ်သားရေဖြင့် လုံအောင်ဖုံး၍မရနိုင်သကဲ့သို့ ကြီးမားကျယ်ပြန့်သော ပြဿနာကြီးတစ်ခုကို အသေးအမွှားကိစ္စရပ်တစ်ခုခုကို အကြောင်းပြကာ ဖြေရှင်းရန်ကြိုးစား၍မရနိုင်ပုံကို ဖော်ပြရာတွင် သုံးနူန်းသော စကားပုံဖြစ်ပါသည်။ စစ်ကောင်စီသည် ယုတ္တိမရှိသော မဲမသမာမှုကို အကြောင်းပြပြီး ဒီမိုကရေစီအစိုးရထံမှ အတင်းအဓမ္မအာဏာလုသည်နှင့် တူညီသည်။

ဆင်ဖြူမျက်နှာ ဆင်မည်းမကြည့်ဝံ့

ဂုဏ်သိက္ခာသမာဓိ၊ကိုယ့်ကျင့်တရားနှင့်ပြည့်စုံသောပုဂ္ဂိုလ်ကို တရားမဲ့ပြုမှုနေထိုင်သူများက ရင်မဆိုင်ဝံ့ပုံကို ဖော်ပြရာတွင် အသုံးပြုသော စကားပုံဖြစ်သည်။ သာဓကအားဖြင့် သမ္မတကြီးဦးဝင်းမြင့်၊ ဒေါက်တာဇော်မြင့်မောင်၊ ဒေါ်အောင်ဆန်းစုကြည်စသောပုဂ္ဂိုလ်များကို မတရားအမှုဆင်ကာတရားရင်ဆိုင်စေသောအခါတွင် လာရောက် လိမ်လည်သက်သေထွက်ဆိုရသောသူများမှာ မမှန်မကန်ထွက်ဆိုရသည်ဖြစ်သဖြင့် သမ္မတကြီးစသူတို့အား ရင်ဆိုင်မကြည့်ဝံသည်နှင့် အလားသဏ္ဌာန်တူညီသည်။

ဆင်မတတ်နိုင် ကြွက်တတ်နိုင်၏

လုပ်ငန်းရပ်တိုင်းတွင် သင့်တော်သောသူဟူသည် ရှိစမြဲပင်။ ဆင်မတတ်နိုင်သောအရာကို ကြွက်တတ်နိုင်သကဲ့သို့ ဂုဏ်သိက္ခာကြီးမားသူ မတတ်နိုင်သည့် ကိစ္စရပ်များကို သာမာန်ပုဂ္ဂိုလ်များက ဆောင်ရွက်နိုင်စွမ်းရှိခြင်းကို ဆိုလိုခြင်းဖြစ်သည်။ သာဓကအားဖြင့်  NUGအစိုးရပ်သည် နိုင်ငံတကာမျက်နှာစာတွင် တော်လှန်ရေးအောင်မြင်အောင် စွမ်းဆောင်နေသကဲ့သို့ တော်လှန်ရေးရဲဘော်များ၊ ယူဂျီများ၊ ထောက်ပို့များကလည်း ဒေသတွင်းတော်လှန်ရေးအတွက် ကိုယ်စီကိုယ်စီ စွမ်းစွမ်းတမံကြိုးစားဆောင်ရွက်နိုင်ကြသည်။ ထို့ကြောင့် လူတိုင်းသည် သူ့နေရာနှင့်သူ အရေးပါသူများချည်းပင် ဖြစ်ကြပါသည်။