ကိုယ့်ကိုယ်ကိုယ်

 

'အဘယ့်ကြောင့် 'ကိုယ့်ကိုယ်ကိုယ်'ရပါသနည်း'

မင်းသန့်ကို(မြန်မာစာလောက)

     ကျွန်တော်တို့ နေ့စဉ်ပြောနေတဲ့ စကားတွေထဲမှာ နာမ်ရဲ့အစားသုံးတဲ့ နာမ်စားဆိုတဲ့စကားလုံးတွေ အများကြီးပါဝင်နေပါတယ်။ဒီ နာမ်စားတွေထဲမှာ လူပုဂ္ဂိုလ်တွေရဲ့ အစားသုံးတဲ့ နာမ်စားစကားလုံးတွေ ၊ တစ်စုံတစ်ရာကို ညွှန်းတဲ့အခါ အစားသုံးတဲ့ နာမ်စားစကားလုံးတွေ ၊ မေးခွန်းမေးတဲ့အခါ အသုံးပြုတဲ့ နာမ်စားစကားလုံးတွေ ၊ အရေအတွက် ပမာဏ အစဉ်ဆိုတဲ့ ကိန်းဂဏန်းဆိုင်ရာ နာမ်စားစကားလုံးတွေ အများကြီးပါဝင်နေပါတယ်။ဒီထဲကမှ လူသုံးများသလောက် အမှားများတဲ့ စကားလုံးကတော့ 'ကိုယ့်ကိုယ်ကိုယ်'ဖြစ်ပါတယ်။

       ဟုတ်ပြီ။ 'ကိုယ့်ကိုယ်ကိုယ်'ကို ဘာလို့ မှားကြရတာလဲဆိုတာကို မပြောခင်မှာ လူထုကြားထဲ ဘယ်လိုရေးထုံးအနေနဲ့ တွင်ကျယ်နေသလဲ၊ဘာလို့ ဒီလိုတွင်ကျယ်နေသလဲဆိုတာကို အရင်လေ့လာဆန်းစစ်ကြည့်ဖို့ လိုပါလိမ့်မယ်။ပြည်သူတွေထဲမှာ အချို့က 'ကိုယ့်ကိုကိုယ်'လို့ ရေးကြတယ်၊ အချို့က 'ကိုယ့်ကိုယ်ကို'လို့ ရေးကြတယ်၊ အချို့က 'ကိုယ့်ကိုယ်ကိုယ်'လို့ ရေးကြတယ်၊ အချို့က 'ကို့ကိုယ်ကို'လို့ ရေးကြပါတယ်။ဒါတွေက အသုံးအတွင်ဆုံး ရေးထုံးတွေပါ။ပထမဆုံး 'ကိုယ့်ကိုကိုယ်'လို့ ရေးတဲ့သူတွေက ဘာကြောင့်ဒီလိုရေးရတာလဲ၊သူတို့တွေရဲ့ ပြောစကားကို ကြည့်ရတဲ့အခါမှာ သူတို့က 'ကိုယ့်' ဆိုတာကိုတော့ 'ကိုယ်၏' လို့ မမြင်ဘဲ 'ကိုယ်'ရဲ့နောက်က 'ကို'ကြောင့် 'ကိုယ့်'ဖြစ်လာတယ်လို့ မြင်ကြတာပါ။ နောက်က ကပ်နေတဲ့'ကို'ကြောင့် 'ကိုယ့်'ဖြစ်လာတယ်။ဒါကြောင့်ပဲ 'ကိုယ့်ကို'လို့ ဖြစ်ရမယ်လို့ ထင်ကြတာပါ။ပြီးတော့မှ 'ကိုယ့်ကို ကိုယ်က'ဆိုတဲ့ အဓိပ္ပာယ်နဲ့ နောက်က 'က'ကိုဖြုတ်ပြီး 'ကိုယ့်ကိုကိုယ်'လို့ ရေးကြတာဖြစ်ပါတယ်။'ကိုယ့်ကိုကိုယ်'လို့ ရေးသူများရဲ့ ယူဆချက်အနှစ်ချုပ်ကို ကြည့်ရရင် 'ကိုယ်'ဆိုတဲ့ နာမ်စားဟာ နောက်က 'ကို'ဝိဘတ်ကပ်လို့ 'ကိုယ့်'ဖြစ်လာတယ်။ဒါကြောင့် 'ကိုယ့်ကို'က ကံပုဒ်ဖြစ်လာပြီး ပြုလုပ်သူကတ္တားကလဲ 'ကိုယ်'ပဲဖြစ်လို့ 'ကိုယ့်ကိုကိုယ်'လို့ ရေးရမယ်လို့ မြင်ကြတာဖြစ်ပါတယ်။ဒါဟာ မမှန်ပါဘူး။ရှေ့က 'ကိုယ့်ကို'မှာ 'ကို'ဆိုတဲ့ ကံဝိဘတ်ကို ထည့်ရေးမယ်ဆိုရင် နောက်က'ကိုယ်'မှာလဲ 'က'ဆိုတဲ့ ကတ္တားဝိဘတ်ထည့်ရေးရပါမယ်။ဒါဆိုရင် 'ကိုယ့်ကိုကိုယ်က' ဖြစ်သွားမှာပါ။ဒီအတွက်ကြောင့် 'ကိုယ့်ကိုယ်ကို' ဆိုတာ မှားပါတယ်။

        အဲဒီလိုမဟုတ်ဘဲ တချို့ကျတော့ 'ကိုယ့်ကိုယ်ကို' လို့ ရေးကြပါတယ်။ဒီလူတွေကတော့ 'ကိုယ်၏ + ခန္ဓာကိုယ် + ကို'လို့ ကတ္တားပုဒ်မပါဘဲ ယူဆကြသူတွေ ဖြစ်ပါတယ်။ဒီလို 'ကိုယ့်ကိုယ်ကို' လို့ရေးတဲ့အခါ ကံပုဒ်သီးသန့်ဖြစ်နေတဲ့အတွက် ပြုလုပ်သူကတ္တားမိမိအတွက် အစားသုံးတဲ့ 'ကိုယ်' မပါလာတော့ပါဘူး။ဒါကြောင့် 'မိမိကိုယ်မိမိ'ဆိုတဲ့သဘော မသက်ရောက်တော့ပါဘူး။ပြုသူကလဲ မိမိ၊အပြုခံကလဲ မိမိ ဖြစ်မှသာ 'မိမိကိုယ်မိမိ'ဆိုတဲ့သဘောသက်ရောက်မှာ ဖြစ်ပါတယ်။လူတွေ ပြောနေကြတဲ့ ''ကိုယ့်ကိုကြည့်''ဆိုတဲ့စကားဟာ ''ကိုယ့်ကိုယ်ကို ကြည့်"ဆိုတဲ့စကားထဲက 'ကိုယ်'ကို မြုပ်ထားတာဖြစ်ပါတယ်။"ကိုယ့်ကိုယ်ကို ကြည့်"ဆိုကတည်းက ကြည့်မဲ့သူကတ္တားက တခြားသူဖြစ်သွားပါပြီ၊ 'မိမိ'မဟုတ်တော့ပါဘူး။ထင်ရှားအောင် ဥပမာအနေနဲ့ ပြောရရင် ကောင်လေးနဲ့ကောင်မလေး စုံတွဲ ရန်ဖြစ်လို့ ကောင်လေးဖြစ်သူက "ကိုယ့်ကိုကြည့်"လို့ ပြောတာဟာ ‌စကားပြောနေတဲ့ 'ကိုယ်'ရဲ့'ကိုယ်ခန္ဓာ'ကို မကြည့်ဘဲ ကောင်မလေးက မျက်နှာလွှဲနေလို့ ပြောသူနာမ်စား'ကိုယ်'ရဲ့ ကိုယ်ခန္ဓာကို ကြည့်ခိုင်းတာပါ။ကောင်မလေး ပြန်ကြည့်လိုက်တယ်ဆိုပါစို့။ဒီလိုဆိုရင်‌ ပြောသူနာမ်စား'ကိုယ့်'ကိုကြည့်လိုက်တဲ့ ကောင်မ‌လေးက ကတ္တားပုဒ်ဖြစ်သွားပြီး အကြည့်ခံရတဲ့ ကိုယ်က ကံပုဒ်ဖြစ်သွားပါပြီ။ဒီလိုဆိုရင်ကြောင့် မိမိကိုယ်မိမိ ဆိုတဲ့သဘောမဖြစ်တော့ပါဘူး။ဒါကြောင့် မိမိကို ပြန်ညွှန်းတဲ့ 'ကိုယ်'မပါတဲ့ 'ကိုယ့်ကိုယ်ကို'ကလဲ မှားပါတယ်။

        ဒီလို မဟုတ်ဘဲ 'ကို့ကိုယ်ကို'ဆိုတဲ့ သူတွေလဲ ရှိပါတယ်။သူတို့ကတော့ 'ကို' ဆိုတာကို နာမ်စားအဖြစ်သုံးကြသူတွေပါ။အထက်က 'ကိုယ့်ကိုယ်ကို' နဲ့ သဘောချင်းထူးမခြားနားပါပဲ။အပေါ်က'ကိုယ့်'နဲ့ အောက်က'ကို့'၊ 'ယသတ်'ပါခြင်း၊မပါခြင်းပဲ ကွာပါတယ်။ဒီအတွက်ကြောင့် အထူးတလည်ရှင်းစရာ‌ မလို‌တော့ပါဘူး။ဒီ'ကို့ကိုယ်ကို'ဆိုတာကလဲ မှားပါတယ်။နောက်ဆုံး 'ကိုယ့်ကိုယ်ကိုယ်'လာပါပြီ။ဒီမှာ ပထမဆုံးလာတဲ့ 'ကိုယ့်'က အကျယ်ဖြန့်ရင် 'ကိုယ်၏'ဖြစ်ပါတယ်။နောက်က 'ကိုယ်'ကပ်ထားလို့ '‌ အောက်မြစ်'ပါတာ မဟုတ်ပါဘူး။'ကိုယ်၏'မှာ '၏'ရဲ့သင်္ကေအသုံးအဖြစ် အောက်မြစ်ကို 'ကိုယ့်'လို့ ထည့်တာဖြစ်ပါတယ်။'ကိုယ်၏'ဆိုရင် ပိုင်ဆိုင်ခြင်းပြပုဒ်ဖြစ်သွားပြီဖြစ်လို့ ပိုင်ဆိုင်မှုကိုခံရတဲ့ အရာလဲ နောက်မှာကပ်ပါလာရမှာ ဖြစ်ပါတယ်။ကိုယ် ပိုင်ဆိုင်တဲ့အရာက 'ကိုယ်ခန္ဓာကြီး'ဖြစ်လို့ 'ကိုယ့်ကိုယ်' လို့ဖြစ်လာပါတယ်။ဟုတ်ပြီ၊ ဒီ 'ကိုယ့်ရဲ့ခန္ဓာကိုယ်'ဆိုတာနဲ့ မိမိကိုယ်မိမိ ပြန်ညွှန်းနိုင်ပြီလား။မညွှန်းနိုင်သေးပါဘူး။'ကိုယ့်ခန္ဓာကိုယ်'ကို ကိုယ်ကပဲ တစ်စုံတစ်ခုပြုမှာဖြစ်လို့ 'ကိုယ့်ကိုယ်ကို'လို့ 'ကို'ဆိုတဲ့ ကံဝိဘတ်လေး ထည့်ပေးရပါတယ်။ဒါဆိုရင် 'ကိုယ့်ကိုယ်ကို' ဆိုတဲ့ အပြုခံကံပုဒ် ရသွားပါပြီ။ဒါပေမဲ့ ပြုလုပ်သူကတ္တားဖြစ်တဲ့'ကိုယ်က'ဆိုတာ

ကျန်နေပါသေးတယ်။ဒါကြောင့် 'ကိုယ့်ကိုယ်ကိုကိုယ်က' လို့ ရေးလိုက်မှ 'မိမိကိုယ်မိမိ'ဆိုတဲ့ ပြည့်စုံတဲ့'အတုံ့နာမ်စား'တစ်ခု ဖြစ်လာပါတယ်။ဒါကို 'သမာသ'ဆိုတဲ့ စကားလုံးကျုံ့အောင် ကြားကဝိဘတ်ကိုချုံ့တဲ့နည်းအရ 'ကိုယ်၏ကိုယ်ကိုကိုယ်က' မှာပါတဲ့ '၏'ဆိုတဲ့ ပိုင်ဆိုင်ခြင်းပြဝိဘတ် ၊ 'ကို'ဆိုတဲ့ ကံဝိဘတ် ၊ 'က'ဆိုတဲ့ ကတ္တားဝိဘတ်တွေကို ချုံ့ပစ်လိုက်တဲ့အခါ '၏'က 'အောက်မြစ်'ဖြစ်သွားပြီး ကျန်တဲ့'ကို နဲ့ က'က ကျုံ့ပြီးပျောက်သွားပါတယ်။ဒါကြောင့် 'ကိုယ့်ကိုယ်ကိုယ်'ဆိုတာပဲ ကျန်‌ပါတော့တယ်။ဒါကြောင့် 'ကိုယ့်ကိုယ်ကိုယ်'ကသာ အမှန်ဖြစ်ပါတယ်။

       ဒါကတော့ အသေးစိတ်နားလည်ချင်သူများအတွက် အသေအချာ‌ရှင်းပြတာဖြစ်ပါတယ်။အသေးစိတ်ရှင်းပြမှ နားပိုရှုပ်သွား၊မျက်စိပိုလည်သွားနိုင်ပါတယ်။ဒါကြောင့်အလွယ်တကူ လူပြိန်းနည်းနဲ့ မှတ်မယ်ဆိုရင်တော့ 'နင့်ကိုယ်နင်' ၊ 'သူ့ကိုယ်သူ' ၊ 'မိမိကိုယ်မိမိ' ၊ 'ငါ့ကိုယ်ငါ' နည်းတူ 'ကိုယ့်ကိုယ်ကိုယ်'လို့ ရေးရမှာဖြစ်တယ်လို့ မှတ်ထားရုံပါပဲ။ဒီလောက်ဆိုရင်တော့ ဘာကြောင့်'ကိုယ်ကိုယ်ကိုယ် ရပါသနည်း'ဆိုတဲ့ မေးခွန်းကို နားလည်သဘောပေါက်လောက်ပြီလို့ ယူဆလိုက်ပါတယ်။ ။